Каля будынка Арганізацыі Аб'еднаных Нацыяў 10 лютага прайшла дэманстрацыя ў абарону маладзёвых актывістаў у Беларусі, якіх перасьледуе рэжым Лукашэнкі. Акцыю арганізаваў Беларускі Маладзёвы Рух Амэрыкі.

Удзельнікі патрабавалі спыніць перасьлед актывістаў Маладога Фронту, а таксама выказвалі падтрымку ўсім, хто змагаецца за дэмакратыю ў Беларусі.

Амаль дзьве гадзіны цягнулася акцыя і сярод хмарачосаў гучалі лёзунгі: "Верым, можам пераможам!", "Свабоду!", "Жыве Беларусь!", "Беларусь у Эўропу!", "Belarus - yes! Lukashenko - no!".

На акцыі прысутнічаў і выступіў з прамоваю лідэр КХП БНФ Зянон Пазьняк. Дзякуючы прыцягальнасьці ягонай асобы для моладзі, а таксама таму, што дэманстрацыю падтрымала Задзіночаньне Беларускай Моладзі ў Амэрыцы (Моладзі БАЗА), акцыя атрымалася досыць мнагалюднай.