Апошнім часам у інтэрнэце зьявіліся аб’явы, дзе нехта прапануе набыцьцё грамадзянства Беларускай Народнай Рэспублікі, быццам-бы са згоды Рады БНР. Такую аб’яву, напрыклад, пакінуў у шмат якіх беларускіх гасьцявых кнігах і форумах чалавек, які падпісваецца імём Міхась Вашкевіч (варыянт Міхаіл Вашкевіч). Вашкевіч паведамляе, што піша з Баўгарыі, што пацьвярджаецца ягоным IP-адрасам. Паводле ягоных слоў, ён прадстаўляе так званы «Камітэт за свабодную, дэмакратычную і незалежную Беларусь» у Баўгарыі. Прапануюцца адрасы www.ksdnb.data.bg (старонкі не існуе) і www.fdb-b1.narod.ru (непрафэсыйна зроблены сайт з мінімумам інфармацыі на расейскай і баўгарскай мовах і мноствам спасылак). Ніякой інфармацыі пра гэты камітэт больш нідзе знайсьці не ўдалося.

Паведамленьні Вашкевіча звычайна напісаныя па-расейску, або па-беларуску, расейскімі літарамі. У абодвух выпадках гэта характэрызуецца вялікай колькасьцю артаґрафічных памылак.

Што тычыцца грамадзянства БНР, то карыстальнікам прапануецца запоўніць анкету, дзе акрамя ўсяго належыць падаць свой хатні адрас, тэлефон, нацыянальнасьць і нават упісаць сваіх дзяцей, і адаслаць яе на адрас k_sdnb@abv.bg

Рада БНР, у той-жа час, афіцыйна паведаміла, што грамадзянства БНР нікому не выдаецца, бо яго, па-просту, не існуе. І ўжо тым болей ніякіх пасярэдніцкіх функцыяў Рада нікому не давала. Застаецца толькі гадаць, зь якою мэтаю нехта намагаецца сабраць чыюсьці асабістую інфармацыю. Наогул, усе павінны ведаць, што калі яны сустрэнуць або атрымаюць па электроннай пошце прапанову атрымаць грамадзянства БНР, то перад тым, як дасылаць свае дадзеныя на незнаёмы адрас, спачатку варта крыху падумаць.

Дадатак (08.06.05)

Гэта не тычыцца сайта сымбалічнага грамадзянства bnr.belinter.net, стварэньне якога было ініцыятывай Кансэрватыўна Хрысьціянскай Партыі БНФ.

Ваш камэнтар

Імя
Места
Пошта
Камэнтар
Антыспам *	* Увядзіце тэкст, які бачыце на малюнку справа. Гэта патрэбна нам для абароны ад аўтаматычных рэклямных паведамленьняў.